Pen-blwydd hapus iawn i’r Sefydliad Cerddoriaeth Gymreig oedd yn dathlu eu pen-blwydd yn 10 oed yr wythnos diwethaf!
Mae’r sefydliad wedi bod yn gweithredu’n brysur dros y blynyddoedd i geisio cryfhau isadeiledd y sin gerddoriaeth yng Nghymru a helpu i hyrwyddo’r sin.
Fel rhan o’r dathliad fe gynhaliwyd sesiynau arbennig gan y sefydliad yng Nghanolfan y Mileniwm, Caerdydd dros y penwythnos gyda phob math o weithdai a seminarau. Roedd yna hefyd ddau gig i ddathlu gyda Future of The Left yn headlinio nos Wener, Spencer McGarry Season yn brif atyniad nos Sadwrn.
Mae’r SGC hefyd yn bwriadu cynnal ail ddathliad yn y Gogledd fis nesaf, a hynny yn y Galeri Caernarfon ar 7 a 8 Hydref. Bydd ‘na amrywiaeth o seminarau a chyflwyniadau ynghyd ag adloniant gyda’r hwyr. Ymysg y rheiny fydd yn perfformio ar y Castell a’r Morgan Lloyd dros y penwythnos bydd Sian James, Colorama a Gwilym Morus.
Cadwch olwg ar y wefan yma am y manylion llawn.